Bencic ha conquistà la victoria
Belinda Bencic ha dumagnà l'emprim test a l'Australian Open a Melbourne. La Svizra cuntanscha la segunda runda grazia ad ina victoria cunter la Slovaca Anna Karolina Schmiedlova en dus sets cun 6:3 e 7:5.
Bencic ha stuì batter ferm per la victoria, cunquai che Schmiedlova ha adina puspè mess sut squitsch la Svizra. En il segund set era la Slovaca schizunt cun 3:0 e dus breaks en avantatg.
En la proxima runda frunta Bencic sin la Lettona Jelena Ostapenko.
Wawrinka persvada
Stan Wawrinka, il victur da l'Australian Open 2014, ha gudagnà cunter il Bosniac Damir Dzumhur (ATP 92) en quatter sets cun 7:5, 6:7 (7:4), 6:4 e 6:4. Da las trais partidas che Wawrinka ha dà fin uss cunter Dzumhur, aveva il Svizzer pers las emprimas duas. Er questa giada era il Bosniac in ferm adversari. En ils muments decisivs è Wawrinka dentant stà pli cool, ed era sur l'entir gieu il meglier giugader.
En la proxima runda frunta il Vadais sin il Talian Andreas Seppi (ATP 85).
Federer cunter Krajinovic
En la segunda runda dal turnier da Grand Slam a Melbourne frunta Roger Federer sin il Serb Filip Krajinovic. Fin uss ha Federer gudagnà tut ils trais duels cunter il Serb. La partida è damaun avantmezdi, temp svizzer.
RTR novitads 06:00