Il podest
- Beat Feuz, 1:42,53
- Dominik Paris (ITA), +0,29
- Thomas Dressen (GER), +0,31
Per la terza giada suenter il 2012 e 2018 gudogna Beat Feuz la cursa rapida al Lauberhorn. Il skiunz da l'Emmental ha mussà sin il traject scursanì da la cursa ina prestaziun quasi perfetga. Sper Franz Klammer è Feuz l'unic skiunz ch'ha gudagnà – dapi la fundaziun da la cuppa mundiala – trais giadas la cursa rapida al Lauberhorn.
Tenor Urs Lehmann, il president da Swiss-Ski, è Beat Feuz simplamain in scheni sin skis e las cundiziuns a Wengen sajan per el perfetgas.
Ils ulteriurs Svizzers
- 5. Mauro Caviezel, +0,42
- 8. Niels Hintermann, +0,93
- 10. Ralph Weber, +1,00
- 15. Carlo Janka, +1,54
- 26. Lars Rösti, +1,84
- 28. Gilles Roulin, +2,03
- 35. Stefan Rogentin, +2,17
Er ils ulteriurs Svizzers han persvadì en la cursa rapida. Mauro Caviezel ha bain pers temp pervi d'in sbagl en il Kernen-S, tuttina hai anc bastà per il 5avel plaz. Per Caviezel è quai la meglra prestaziun fin uss al Lauberhorn. Ed er Carlo Janka ha pervi d'in sbagl manchentà cleramain il podest. El è la finala vegnì 15avel.
Niels Hintermann ha cun ses 8avel plaz realisà il segund-meglier resultat da sia carriera. E Ralph Weber ha cun il numer da partenza 34 sco dieschavel realisà ses meglier resultat en la cuppa mundiala.
Traject scursanì
En la Part Sura Bernaisa avevi dà var 30 centimeters naiv nova la notg sin la sonda. Ed ina part da la pista a Wengen era donnegiada. Cun scursanir la cursa e duvrar la partenza da la cumbinaziun, han ils skiunzs duvrà var ina minuta pli pauc per vegnir giu l'arrivada. Normal dovran els var 2 minutas e mez.
RTR novitads 10:00