Siglir tar il cuntegn

Naziunal/Internaziunal Tessa Worley gudogna, Simone Wild vegn quarta

La Franzosa gudogna il slalom gigant a Lai. Quai avant Viktoria Rebensburg e Meta Hrovat. Grazia a ses quart plaz sa qualifitgescha Simone Wild il davos mument per ils gieus olimpics en la Corea dal Sid.

Il podest

  • 1. Tessa Worley (Fr) 2:10,81
  • 2. Viktoria Rebensburg (De) +0,07
  • 3. Meta Hrovat (Sln) +1,45

Tessa Worley festivescha a Lai sia emprima victoria da la stagiun. Trais giadas è la Franzosa gia stada secunda. Worley gudogna il slalom gigant cun in avantatg da 7 tschientavels sin la Tudestga Viktoria Rebensburg. Terza vegn la Slovena Meta Hrovat. Per Hrovat èsi l'emprim plaz da podest da sia carriera.

Wild als gieus olimpics

La Turitgaisa Simone Wild è meglra Svizra. Questa stagiun n'era ella mai stada meglra che 21avla. Wild è sa meglierada en il segund percurs dal novavel sin il quart plaz. Grazia a quest resultat ademplescha la skiunza da 24 onns la norma da selecziun per ils gieus olimpics d'enviern a Pyeongchang. Il podest ha ella manchentà be per quatter tschientavels. Ses meglier resultat era fin uss in settavel plaz l'enviern passà a Sestriere. Las ulteriuras Svizras n'èn betg sa rangadas en las Top 10.

Las ulteriuras Svizras

  • 15. Wendy Holdener +2,58
  • 17. Mélanie Meillard +3,59
  • 20. Lara Gut +3,83
  • 22. Camille Rast +4,28

Er auters stars a Lai

Dasper stars da skis èn er auters stars stads preschents a Lai. Il trenader da l'equipa da ballape naziunala Vladimir Petkovic ha sa laschà carmalar da l'aura e da la buna atmosfera. El spera ch'er quels dal sport da skis guardian l'in u l'auter gieu da ballape.

RR novitads 15:00