Siglir tar il cuntegn
cuntegn

Naziunal/Internaziunal Tge resta dal campiunadi mundial en Russia?

Questa saira da las 17.00 vegn dà l'ultim dals 64 gieus dal campiunadi mundial en Russia. Ensemen cun l'expert da ballape Beat Dermont avain dà in sguard enavos sin il campiunadi mundial 2018.

Purtret da trais ballapedists che discussiuneschan cun l'arbiter.
Legenda: Discussiuns tranter giugaders ed arbiters èn stadas usitadas a quest campiunadi mundial. Reuters

Ils ultims 30 dis n'han betg mo purschì delicatessas als fans da ballape. Uschia manegia er Beat Dermont ch'i haja dà pulit blers gieus ch'èn stads lungurus. Oravant tut cunquai che las equipas pli flaivlas hajan dà fitg defensiv.

Tuttina è Beat Dermont er stà impressiunà dal tempo da tschertas equipas. Cu la Belgia u la Frantscha auzan la spertadad, lura curra insatge.

La Frantscha e la Belgia han persvas

Per il Sursilvan èn la Frantscha e la Belgia era stadas las pli fermas equipas da quest campiunadi mundial. Trumpà el han la Germania, l'Argentina e la Spagna. Trais grondas naziuns dal ballape che han disditg dal tuttafatg.

E sche Beat Dermont discurra da ses giugader preferi, sche lura è quai N'Golo Kanté, giugader amez central da la Frantscha. Sco el dettia bal saja schenial.

La Svizra ha fatg il duer

En l'otgavelfinal hajan ins vis la gronda flaivlezza da la Svizra. Ella haja bregias sch'ella ha da far il gieu, declera Beat Dermont. La Svizra è tenor el ina buna equipa, ma betg ina equipa sensaziunala.

RR Sportissimo 12:00