Siglir tar il cuntegn

Header

video
Nagin Tour de Suisse? Bain! Cun ina premiera mundiala...
Or da RTR Social dals 22.04.2020.
laschar ir
cuntegn

«The Digital Swiss 5» Tour de Suisse virtuala ord stiva

Da mesemna fin dumengia, ils 22 fin 26 d’avrigl, vegni tar ina premiera mundiala. Per l’emprima giada insumma lantschan il Tour de Suisse ensemen cun ROUVY e Velon ina cursa digitala cun las meglras equipas da profis dal mund. Il spezial; ils ciclists n’èn betg sin via, mabain a chasa sin ina rolla.

Pervia dal Coronavirus stat il mund da sport eri. Ils classichers da velo sco per exempel Paris-Roubaix u il Giro d’Italia han gia baud stuì vegnir stritgads. Er il Tour de Suisse che vess manà quest onn durant dus dis en la regiun da Mustér Sedrun è vegnì franà da l’epidemia da corona. Ord quest motiv vegn uss lantschà ina cursa digitala.

Tar quest format da cursa «The Digital Swiss 5» cumbattan ils ciclists durant tschintg dis sin differents tschancuns da las etappas planisadas per il Tour de Suisse da quest onn. Las etappas cuzzan bun in’ura e cumenzan mintgamai la saira a las 17:00 uras.

video
Uschia funcziuna ina cursa da velo virtuala
Or da Sport-Clip dals 20.04.2020.
laschar ir

Pedalar davent da chasa

Ils ciclists sesan a chasa sin lur velos montads vid ina rolla smart ch'è colliada cun l’internet. Durant ch’ils ciclists vesan davant els sin in visur l’etappa ed er mintgamai en tge posiziun che mintgin sa chatta, dat la rolla automaticamain la resistenza sin ils pedals, tut tenor la topografia da la cursa.

Nino Schurter
Legenda: Nino Schurter a la testa d'ina gruppa durant il Tour de Suisse 2014. Keystone

Cun Nino Schurter e Matteo Badilatti

A la partenza da questa cursa digitala van mintga di 57 ciclists da 19 differentas equipas, la gronda part equipas dal WorldTour, equipas che fissan uschiglio stadas a la partenza al Tour de Suisse 2020. Er a la partenza è in’equipa svizra che Swiss Cycling ha nominà, tranter quels er ils dus mountainbikers Nino Schurter e Filippo Colombo. Tar quest team tutga er Stefan Küng, actualmain ina da las grondas figuras sin il velo da cursa en Svizra. A la partenza è sper Schurter anc in segund grischun, numnadamain Matteo Badilatti dal Puschlav che parta per l'equipa Israel Start-Up Nation.

RR actualitad 17:00