En futur na trenescha il Tudestg Thorsten Fink betg pli Austria Wien. ll successur n'è anc betg enconuschent.
La terrada da la sonda, ch'è stada la 11avla terrada da la stagiun, è stada memia bler per l'um da 50 onns. Suenter 24 rundas è il club da ballape Austria Wien sin il 7avel plaz da la Bundesliga austriaca.
Er gia meglier temps
Fink aveva cumenzà a trenar l'equipa da ballape la stad 2015. El è vegnì cun sia equipa ina giada segund ed ina giada terz en il campiunadi austriac. Plinavant ha el purtà ils ballapedist dad Austria Wien duas giadas en la fasa da gruppa da l'Europa League.
Dal 2009 fin l'october 2011 ha l'anteriur profi da Bayern trenà il FC Basilea. Cun il FC Basilea ha el pudì celebrar dus titels da campiun svizzer ed ha ina giada gudagnà la cuppa svizra. Suenter è el turnà en Germania ed ha trenà ils club da ballape da Hamburg (HSV). Là è el vegnì relaschà ed ha surpiglià l'equipa ch'el banduna uss – Austria Wien.
RR novitads 15:00