Tognoni di che nagin n'haja ina schanza encunter il president actual. Quel haja 4 onns peda da preparar sia proxima elecziun. Il president actual na fetschia nagut auter che far regals, pajar daners, bels viadis e far bellas tschainas.
Il president da la FIFA è là per far regalar a las federaziuns, per regalar a ses amis e per far amis per 4 onns.
Sche l’UEFA avessi gì ina schanza regulara cun in cuntracandidat, n’avessia ella betg nominà van Praag u Figo, mabain il Franzos Michel Platini. Van Praag e Figo n’hajan betg las enconuschientschas necessarias per il post a la testa da la FIFA.
Jau na crai betg che Blatter vul smetter voluntarmain, el vul murir en quest post.
Midar sistem electoral
Tognoni na crai betg ch’i vegni a sa midar insatge en il sistem da la FIFA. Quai ch’el giavischa è, ch’ins mida il sistem electoral tenor quel dals Stadis Unids cun la limitaziun dal temp d’uffizi sin 2 periodas, pia 8 onns. I na possia betg esser, ch’il president dal pli impurtant pajais dal mund stoppia chalar suenter 8 onns, il president da la FIFA possia dentant restar senza limitaziun.
