Siglir tar il cuntegn

Header

video
Olympia in Tokio findet nicht 2020 statt
Or da Sport-Clip dals 24.03.2020.
laschar ir
cuntegn

Tokyo 2020 Ils gieus olimpics vegnan spustads

Ils gieus olimpics da stad a Tokyo vegnan spustads per in onn. Quai ha declerà il primminister giapunais Shinzo Abe. Il Giapun saja sa cunvegnì cun il president dal Comité olimpic internaziunal Thomas Bach ch'ils gieus olimpics duain sin il pli tard avair lieu la stad en in onn.

Il president dal Comité olimpic internaziunal IOC Thomas Bach haja acceptà per 100% sia supplitga, ha declerà Abe. La decisiun definitiva sto dentant anc vegnir approvada dal IOC, la citad ospitanta Tokyo sco er dal Comité olimpic dal Giapun.

Da spustar ils gieus olimpics da stad ch'eran planisads dals 24 da fanadur fin ils 9 d'avust 2020 è quasi la suletta opziun cunquai ch'il svilup da la pandemia dal coronavirus è intschert.

Gia glindesdi ha Abe sincerà che dir giu ils gieus na vegnia betg en dumonda. El ha dentant concedì che l'occurenza sportiva na possia sut las circumstanzas actualas betg avair lieu. Dumengia passada aveva il IOC communitgà da vulair decider aifer las proximas quatter emnas.

Malgrà la spustada sin l'onn proxim restia «Tokyo 2020» il num uffizial ha communitgà il IOC.

Decisiun istorica

La spustada probabla è ina decisiun istorica. Fin uss èn ils gieus adina vegnids stritgads e quai gia pliras giadas. Durant l'emprima guerra mundiala han ins stritgà ils gieus olimpics da stad a Berlin (1916) ed en la segunda guerra mundiala ils gieus da stad a Tokio (1940) e Londra (1944), sco er ils gieus d'enviern a Corina d'Ampezzo (1940) e Sapporo (1944).

Er Paralympics èn spustads

Il comité paralimpic internaziunal IPC ha confermà ch'era ils gieus olimpics per sportistas e sportists cun impediments vegnan spustads. «Da spustar ils gieus saja absolutamain la dretga decisiun», ha ditg il president da l'IPC, Andrew Parsons.

Vuschs da sportistas e sportists svizzers

L'emprim er jau in zic trumpada, hai dentant spetgà questa decisiun. En quest temp datti chaussas ch'èn pli grondas ed impurtantas ch'il sport.
Autur: Mujinga KambundjiSprintra
Jau sun uss cuntent ch'jau hai clerezza. Uss croda davent il trenament specific per concurrenzas. Jau sper uss che la qualificaziun na cumenzia betg cumplettamain tar nulla.
Autur: Nicola SpirigVictura olimpica triatlon
Jau chat la decisiun absolutamain raschunaivla ed endretg en questa situaziun mundiala speziala. I dovra temp da luvrar or ina tscherta trumpada e da cumenzar da nov.
Autur: Giulia SteingruberGimnasta artistica

Per tadlar curt e concis:

RTR novitads 14:00

Artitgels legids il pli savens

Scrollar a sanestra Scrollar a dretga