Toni Livers da Trun ha terminà la stagiun da passlung cun in grond success en Norvegia. Sco gia l'onn passà ha il sportist da 33 onns gudagnà il Skarverennet, il final tradiziunal da la stagiun da passlung en Norvegia. Passa 12'000 persunas han prendì part a questa cursa da 37 kilometers en il stil liber en la regiun alpina tranter Oslo e Bergen, tranter quels 12'000 er l'entira equipa naziunala da la Norvegia cun excepziun da Martin Johnsrud Sundby, il victur da la cuppa mundiala.
Avantatg da passa ina minuta
Toni Livers ha gudagnà a moda suverana cun in avantatg da passa ina minuta sin ils dus norvegais Emil Iversen e Simen Hegstad Krüger.
Toni Livers è pir il terz Svizzer ch'ha gudagnà il Skarverennet e l'emprim Svizzer ch'ha gudagnà duas giadas quest final da la stagiun en Norvegia. L'onn 2009 aveva Dario Cologna gudagnà ed il 2010 Curdin Perl.
Indigena gudogna tar las dunnas
Uschè suveran sco Toni Livers tar ils umens ha er Therese Johaug gudagnà tar las dunnas. La dominatura da la stagiun ha medemamain gudagnà cun in avantatg da passa ina minuta sin sia cumpatriota norvegiaisa Ingvild Flugstad Oestberg. Terza è vegnida Seraina Boner, la partenaria da Toni Livers.
Therese Johaug è propi currida nundetg svelt. Sch'ella fiss vegnida rangada tar ils umens, fiss ella vegnida 30avla. Johaug è schizunt stada pli svelta che Petter Northug, dubel-campiun olimpic e 13 giadas campiun mundial. Johaug batta Northug, quai è oz il grond tema en ils meds da massa online en la Norvegia.
RR novitads 15:00