Siglir tar il cuntegn
cuntegn

Naziunal/Internaziunal Tour de ski 1 – Klaebo gudogna a Tschierv

Il final ha confermà il maletg dals mezfinals: Ils favurits gudognan l'ediziun da la Tour de ski 2018/19 en Val Müstair. Klaebo vegn emprim avant Pellegrino ed Ustjugow. Ils Svizzers eran crudads gia avant ord la decisiun: Furger en il mezfinal, Cologna, Rüesch e Schaad gia en ils quartfinals.

Ils trais umens sin il podest.
Legenda: Pellegrino, Klaebo ed Ustjugow – ils trais umens sin il podest a Tschierv. RTR, georg luzzi

Il public da l'ediziun da la Tour de ski 2018/19 a Tschierv en Val Müstair ha savì giudair fitg bunas prestaziuns sportivas sin in parcours pretensius – dentant senza participaziun svizra tar las decisiuns. Il sprint gudogna il Norvegiais Klaebo avant il taglian Pellegrino ed il Russ Ustjugow.

Nagin Svizzer en il final

Suenter ils mezfinals èn ils favurits Klaebo e Pellegrino davant. L'unic Svizzer – Roman Furger – croda or sco 5avel da ses mezfinal. Cun quai èn tut ils Svizzers ord la decisiun: Furger en il mezfinal, Cologna, Rüesch e Schaad gia en ils quartfinals.

1 da 4 Svizzers sa qualifitgescha per ils mezfinals

Suenter ils emprims quartfinals èsi cler: La decisiun en Val Müstair vegn ad avair lieu senza Dario Cologna – ed er senza Roman Schaad e Jason Rüesch. Unic Roman Furger sco «lucky loser», il pli svelt da quels betg directamain qualifichads, è da la partida en ils mezfinals.

4 da 10 Svizzers eran sa qualifitgads per ils quartfinals

Cun ina prestaziun suverana (plazza 8) en ils quartfinals ha Dario Cologna, il defensur dal titel, savì restar en il classament general dal Tour de ski en pli u main buna posiziun.

Els guardan.
Legenda: Ils aspectaturs jauers han da desister dad in mezfinal cun lur matador local. RTR, georg luzzi

Dals 10 Svizzers, ch'eran a la partenza per il prolog al sprint a tschierv en la Val Müstair, èn sa qualifichads sper Cologna anc trais auters: Sin plazza 18 Roman Furger, sin plazza 21 Roman Schaad e puspè cun ina prestaziun considerabla Jason Rüesch sin la plazza 25. Per il spezialist da sprint Jovian Hediger n'haja betg tanschì – el è vegnì 32avel.

La situaziun da partenza a la testa: Ils pli svelts da la qualificaziun eran stà ils norvegiais Johannes Klaebo ed Emil Iversen ed il taglian Federico Pellegrino.

Ils quartfinals a Tschierv cumenzan las 12:00.

RR novitads 12:00