Siglir tar il cuntegn

Header

cuntegn

Tour de Ski, 6avla etappa Out en quartfinal per tut ils Svizzers

Ils passlunghists svizzers han giugà a la 6avla etappa dal Tour de Ski be ina rolla secundara. Tant Dario Cologna e Ueli Schnider sco er Laurien van der Graaff èn crudads or en il quartfinal dal sprint classic en la Val di Fiemme.

Dario Cologna è crudà or sco 6avel en il quartfinal dal sprint en stil classic en Val di Fiemme. Il Jauer n'è betg vegnì sin turas. Plinavant è Krüger stgarpitschà, quai ha franà Cologna. Per Cologna è la qualificaziun per il quartfinal gia stada in success. Quella è gartegiada ad el grazia ad in avantatg da be 3 tschientavels sin il 31avel, el è vegnì sco 29avel en l'arrivada dal prolog per ils quartfinals. Er Ueli Schnider è stà qualifitgà per il quartfinal. Pli lunsch n'hai dentant er betg tanschì per el.

audio
Saira: Passlung – Dario Cologna davart la strategia dal sprint
ord Sportissimo dals 04.01.2020.
laschar ir. Durada: 3 minutas 13 Secundas.

Davent da l'entschatta eri cler per Jonas Baumann ch'i vegn fitg grev da sa qualifitgar per la runda da K.O. dal sprint en il stil classic al Tour de Ski. Suenter la qualificaziun era la differenza tar ils pli svelts tar 20 secundas. Jonas Baumann è vegnì 47avel ed ha uschia suenter la qualificaziun pudì ir a sa recrear per l'ultima etappa sin l'Alpe Cermis.

audio
Saira: Passlung – Jonas Baumann suenter il sprint, ed avant Cermis
ord Sportissimo dals 04.01.2020.
laschar ir. Durada: 3 minutas 51 Secundas.

Ils trais umens ch'èn a la chatscha d'in plaz sin il podest dal Tour de Ski èn tuts stads en il final dal sprint classic. Gudagnà il sprint ha il Norvegiais Johannes Hösflot Klaebo avant il duo russ Sergej Ustjuwow ed Alexander Bolschunow.

Bonus da 10 secundas per van der Graaff

Fertant ch'ils passlunghists svizzers n'han gì nagina schanza, ha van der Graaff manchentà il mezfinal per fitg pauc. Il sigl en il mezfinal ha ella manchentà en il duel direct per il segund plaz cunter Ingvild Flugstad Östberg sulet per in dieschavel.

Tar las dunnas ha gudagnà Anamarija Lampic. Per il stan intermediar dal classament general èn uss quatter passlunghistas (herese Johaug, Ingvild Flugstad Östberg, Natalia Neprjajewa ed Astrid Uhrenholdt Jacobsen) entaifer 20 secundas. Therese Johaug ch'è la leva dad ellas resta dentant la favurita en vista a la cursa che munta sin il Alper Cermis.

RTR novitads 11:00+

Artitgels legids il pli savens