Siglir tar il cuntegn

Header

cuntegn

Naziunal/Internaziunal Tour de Ski: Dario Cologna 6avel en il sprint a Lantsch

Il passlunghist grischun Dario Cologna è crudà en il final dal sprint a Lantsch ed è vegnì la fin finala 6avel da l’emprima etappa dal Tour da Ski 2016. Gudagnà il sprint en il stil liber ha il Talian, Federico Pellegrino avant il Russ, Sergey Ustiugov ed il Norvegiais, Finn Haagen Krogh.

Malgrà che Dario Cologna è crudà en il final, po el sa legrar. Cun cuntanscher il final survegn numnadamain era el secundas da bonus. En tut datti 42 secundas da bonus per Cologna. Quai èn be 6 secundas pli pauc che per il grond favurit dal Tour de Ski da quest onn, il Norvegiais Martin Johnsrud Sundby.

Ulteriurs Svizzers manchentan mezfinal

Ils ulteriurs Svizzers èn tuts gia crudads ora en ils quartfinals: Roman Schaad, il pli spert dals Svizzers en la qualificaziun, ha ditg pudì sperar da pudair cuntanscher il mezfinal sco lucky looser – la fin finala n’hai tuttina betg tanschì da sa qualifitgar grazia al temp. Era crudads ora en ils Svizzers Jovian Hediger, Jöri Kindschi e Roman Furger.

Laurien van der Graaff 11avla

Tar las dunnas ha la Norvegiaisa, Maiken Caspersen Falla gudagnà il sprint a Lantsch: quai avant la Svedaisa, Ida Ingemarsdotter ed Ingvild Flugstad Østberg da la Norvegia.

Meglra Svizra è vegnida Laurien van der Graaff sin plaz 11. Ella ha manchentà cleramain il final cun ses 5avel plaz en il mezfinal. Per quel era Laurien van der Graaff anc sa qualifitgada senza problems sco segunda dal quartfinal. Per las duas Svizras, Natahlie von Siebentahl e Nadine Fähndrich, è gia il quartfinal stà staziun finala.

Artitgels legids il pli savens

Scrollar a sanestra Scrollar a dretga