Dario Cologna ed il Tour de ski, quai è ina amur tut speziala. Avant passa diesch onns ha il passlunghist da la Val Müstair gudagnà per l’emprima giada il Tour de ski, ed uschia er per l’emprima giada il classament general da la cuppa mundiala da passlung. Il fratemp ha Cologna gudagnà la seria da cursas gia quatter giadas. La davosa giada avant dus onns.
Era quest onn tutga Dario Cologna tar ils cun favurits. Per il passlunghist Svizzer vegni dentant fitg grev. Sin las emprimas plazzas en mo passlunghists da la Russia e da la Norvegia. Cologna sa chatta sco meglier Svizzer sin plazza dudesch.
Far in pass enavant
La cursa sur 15 kilometers en il stil classic cun partenza da massa è ina cursa per Cologna. In ni l’auter avess suenter trais etappas dal Tour de ski gia esser in zichel stanchels. Quei è la schanza per empruvar da far in pass enavant. Cologna è en mintga cas pront è vul mussar ina ferma cursa. Cun el èn ulteriurs tschintg svizzers a la partenza da l’etappa dad oz a Val di Fiemme,
RTR novitads 14:00