A Toblach steva questa dumengia la segunda etappa dal Tour de ski sin il program. Per ils Svizzers e las Svizras n'haja dà nagin exploit – uschia n'er betg per il victur da l'ultim Tour de ski, per Dario Cologna.
Cologna pudess avair grev da vegnir sin il podest final
Er en sia disciplina speziala, ils 15 kilometers skating cun start singul, n'ha Dario Cologna betg pudì persvader al Tour de Ski. Cun in retard da 48 secundas sin il victur, il Russ Sergej Ustjugow, è il defensur dal titel vegnì 11avel. Fin al kilometer 12 er'el anc 5avel, ma fin la fin ha el anc pers 6 rangs. Per Cologna pudessi vegnir grev da cuntanscher ina plazza da podest en il classament general.
In resultat allegraivel ha il giuven da 22 onns, Beda Klee mussà la dumengia a Toblach. Sco 26avel ha el recaltgà per la segunda giada en sia carriera puncts da la cuppa mundiala.
Von Siebenthal fa il meglier resultat da sia stagiun
Nathalie von Siebenthal ha realisà en la segunda etappa dal Tour de ski a Toblach ses meglier resultat da la stagiun fin uss. En la cursa sur 10 km stil liber è von Siebenthal vegnida 8avla.
Las ulteriuras Svizras han er cuntanschì puncts. Nadine Fähndrich è 22avla e Laurien van der Graaff 23avla. Omaduas han pers radund 1 minuta e mez sin la victura, la Russa Natalia Nepryaeva. Segunda è la Norvegiaisa Ingvild Flugstad Oestberg.
RR novitads 14:00++