Il Tour de ski 2019/2010 cumenza cun ina cursa da distanza cun partenza en massa a Lai. Suenter in sprint en il stil liber il segund di, cuntinuescha il Tour da Silvester e Bumaun a Toblach. A fin va quest punct culminant da questa stagiun sco usità en la Val di Fiemme.
La gronda midada da quest Tour de ski: A l’etappa finala da 9 kilometers siadora sin l’Alpe Cermis vegn partì per l’emprima giada tuts ensemen. Fin oz è quai mintgamai stà ina cursa da persecuziun.
Equipa Svizra
Swiss Ski trametta a la partenza 10 umens e 4 dunnas. Il spezialist da sprint Jovian Hediger e la biatleta Selina Gasparin absolvan dentant be las duas emprimas etappas a Lai.
Cader da Swiss Ski
| Umens | Dunnas |
| Jonas Baumann | Nadine Fähndrich |
| Livio Bieler | Selina Gasparin (fin 29-12) |
| Dario Cologna | Laurien van der Graaff |
| Roman Furger | Lydia Hiernickel |
| Jovian Hediger (fin 29-12) | |
| Erwan Käser | |
| Beda Klee | |
| Toni Livers | |
| Jason Rüesch | |
| Ueli Schnider |
La gronda speranza svizra è sco adina ils davos onns Dario Cologna. Sch’il Jauer po dentant danovamain cumbatter per ina victoria a quest Tour de ski è grev da giuditgar. Al cumenzament da la stagiun a Kuusamo en la Finlanda ha Cologna stuì turnar pli baud a chasa pervi da problems cun in ventrigl. Plinavant patescha Cologna adina puspè da ferma tuss, oravant tut suenter cursas da sprint.
A la davosa cursa da la cuppa mundiala a Tavau è Dario Cologna dentant vegnì terz en la cursa da 15 kilometers stil liber ed ha uschia mussà che sia furma constat per il Tour de ski. Vegn Cologna tras questas 7 etappas senza problems da sanadad auda el danovamain tar in candidat da podest. Quatter giadas ha el gia triumfà (2009, 2011, 2012, 2018), munta record.
Top favurits norvegiais
La concurrenza internaziunala è quest onn fitg gronda, er perquai ch’il Tour de ski vala per ils blers sco il punct culminant en ina stagiun senza campiunadis mundials u gieus olimpics. Tant tar ils umens sco er tar las dunnas valan ils Norvegiais sco ils gronds favurits. Tar ils umens è quai Johannes Hösflot Klaebo, il defensur dal titel, e tar las dunnas Therese Johaug ch’ha dominà en questa stagiun tut las cursas da distanza.
Cologna e Van der Graaff cun bunas regurdientschas
Ils dus Svizzers Dario Cologna e Laurien van der Graaff sa regordan gugent da las duas davosas etappas dal Tour de ski a Lai avant dus onns. Omadus avevan procurà per victorias svizras. Durant che Cologna ha gudagnà gist omaduas etappas a Lai e silsuenter triumfà per la quarta giada al Tour de ski ha Van der Graaff gudagnà il sprint a Lai e festivà avant ils fans da chasa sia emprima victoria insumma da la cuppa mundiala.
Program dal Tour de Ski 2019/2020
| Lieu | Data | Disciplina |
| Lai | 28 da december 2019 | 15/10 km stil liber – partenza en massa |
| Lai | 29 da december 2019 | sprint stil liber |
| Toblach | 31 da december 2019 | 15/10 km stil liber |
| Toblach | 1 da schaner 2020 | 15/10 km stil classic – persecuziun |
| Val di Fiemme | 3 da schaner 2020 | 15/10 km stil classic – partenza en massa |
| Val di Fiemme | 4 da schaner 2020 | sprint stil classic |
| Val di Fiemme | 5 da schaner 2020 | 9 km stil liber – partenza en massa |
RR actualitad 08:00