Entant che radund la mesadad dals chavals vegnan transportads mintga fin d’emna bel ed aposta per las cursas, restan ils auters per part durant tut las trais emnas da las cursas a San Murezzan. Dentant betg per far vacanzas.
Ils trenaders e possessurs dals chavals èn numnadamain da l’avis ch’i saja meglier da tegnair ils animals pli daspera al lieu d’occurrenza. Quai perquai ch’ils sportists sin quatter chommas profitian medemamain dal trenament en l’autezza, els hajan pli pauc stress da viadi ed avunda temp per s'adattar a la naiv.
White Turf San Murezzan cun blers aspectaturs
Tenor ils organisaturs han passa 10'500 visitadras e visitaders procurà per ina svieuta da scumessas da radund 57'000 francs durant las 7 cursas. L'onn passà avevan anc 9'500 persunas visità las occurenzas en l'Engiadina. La svieuta da scumessa è dentant stada per bunamain 9'000 francs pli pitschna quest onn. Punct culminant da la segunda dumengia da cursa è stà la disciplina da trottar. Gudagnà la concurrenza ha il chaval Apollo San cun ses possessur dal Giura.
RR Novitads 06:00