Suenter ch'il Serb ha pers in gieu da service cunter il Spagnol Pablo Carreno Busta, ha el er pers la gnerva ed ha sajettà in bal cun gritta enavos. Quel ha tutgà il culiez d'ina guardialingias. Lezza è ida per terra, ma è sa revegnida svelt. L'acziun da Novak Djokovic n'è betg stada intenziunada. Tuttina n'han ils arbitraders gì nagin'autra pussaivladad che da disqualifitgar il favurit dal turnier.
La disqualificaziun dal numer 1 dal mund – ch'ha quest onn anc pers nagina partida – munta er ch'i vegn a dar in nov victur al turnier da Grand Slam a New York.
Il sportist sa perstgisa
Suenter ch'il Serb Novak Djokovic è vegnì disqualifitgà a l'US Open è el sa perstgisà en las medias socialas per sia acziun. Ses cumportament sbaglià e sia disqualificaziun veglia el prender sco lecziun.
