Siglir tar il cuntegn

Bonjour e bonsoir la France Tgi daventa il proxim adversari dals Svizzers?

La naziunala svizra da ballape frunta en l’otgavelfinal dal campiunadi d’Europa en Frantscha sin il segund da la gruppa C. En dumonda vegnan trais adversaris, la Germania, la Pologna e l’Irlanda dal Nord.

Scena or dal gieu Svizra Frantscha nua ch'in tricot stgarpa.
Legenda: Èsi la Germania, la Pologna u l'Irlanda dal Nord che succeda a la Frantscha sco adversari dals Svizzers? Keystone

Avant il davos gieu da gruppa è la Pologna sin il segund plaz. Ils Polacs fruntan mardi saira a Marseille sin l’Ucraina. Ils Tudestgs dattan a Paris encunter l’Irlanda dal Nord. Omadus gieus cumenzan a las 18:00 uras.

La Pologna è actualmain l’adversari il pli probabel. Ils Polacs cun lur star Robert Lewandowski fiss in’equipa che la Svizra pudess batter, dat l’equipa da Vladimir Petkovic uschia vinavant sco enfin ussa. Sin palpiri è pli probabel l’Irlanda dal Nord la pli flaivla equipa. Mo las equipas dal nord èn gist lura grev da batter cura ch’i va per la liongia.

Cun ils Tudestgs survegniss la Svizra in dals pli grevs adversaris insumma a quai turnier. L’equipa da Joachim Löw è l’actual campiun mundial ed in dals gronds favurits sin il titel. Encunter il grond vischin dal nord duvrassi en mintga cas ina sensaziun per batter el. Mo surpraisas hai adina dà en il mund dal ballape.