Siglir tar il cuntegn

Header

cuntegn

Bonjour e bonsoir la France Ungaria ed Islanda èn las grondas surpraisas

La fasa da gruppa al campiunadi d’Europa è a fin. Per 8 da 24 equipas hai uschia num pachetar las valischs e turnar a chasa. 16 equipas astgan anc siemiar dal titel, tranter quellas er la Svizra.

audio
Bunura: Bonjour la France - bilantscha suenter la fasa da gruppa
ord Actualitad dals 23.06.2016.
laschar ir. Durada: 5 minutas 21 Secundas.

La gronda surpraisa è capitada en la gruppa F. Là è l’Ungaria sa qualifitgada sco victur da gruppa per l’otgavelfinal, quai ensemen cun l’Islanda ed il Portugal. L’Ungaria ch’era sa qualifitgada be sur ils gieus da barrage per l’EURO en Frantscha ha pers gnanc in soli gieu da gruppa. Il medem vala per l’Islanda ch’ha tants abitants sco la citad da Turitg. Perencunter sto l’Austria, l’equipa da Marcel Koller, prender cumià da l’EURO. Ils Austriacs avevan dominà la qualificaziun cun nov victorias ed in pari ord 10 gieus. Al turnier en Frantscha èn ils Austriacs dentant vegnids da recaltgar sulet in punct. A chasa ston era ir pliras equipas da l’ost, numnadamain la Russia, l’Albania, la Rumenia, l’Ucraina, la Tschechia e la Tirchia. A fin è era il turnier per la Svezia cun ses star Zlatan Ibrahimovic.

Italia – Spagna

En l’otgavelfinal vegni tar intgins classichers. Tranter auter frunta l’Italia sin la Spagna, il defensur dal titel. Igl è in duel tranter dus dals gronds, dus campiuns mundials dals davos onns. Per tensiun procura er il duel tranter la Croazia ed il Portugal cun Cristiano Ronaldo. La Svizra frunta sin la Pologna cun Robert Lewandowski. Plinavant dat la Frantscha encunter l’Irlanda, la Germania encunter la Slovachia, la Valisa encunter l’Irlanda dal Nord, l’Ungaria encunter la Belgia e l’Engalterra encunter l’Islanda.

Top 5 en il medem tableau

Ils favurits sin il titel restan ils medems sco gia avant il turnier, quai èn la Germania, la Frantscha, l’Italia e la Spagna. Quellas quatter naziuns ensemen cun ils Englais sa chattan dentant en il medem tableau. Plaz en il final hai sulet per ina da quellas tschintg naziuns. Igl è uschia bain pussibel ch’i dat a l’EURO en Frantscha in final tranter ina gronda ed ina pitschna naziun. Il final è ils 10 da fanader en il Stade de France a Paris.

RR Actualitad 07:00

Artitgels legids il pli savens