Ch’il Portugal turna a chasa cun il buccal avessan ils pli paucs quintà, quai er perquai ch’ils Ibers n’han betg adina persvadì a quai turnier. Cun ina tactica, ina strategia, in ballape pauc attractiv ha il Portugal tuttina giu success.
La finala in titel merità er perquai che nagin, gnanc la Grande Nation è vegnida da franar ils Portugais. In titel merità èsi la finala er grazia a Cristiano Ronaldo, il superstar e figura centrala dal Portugal.
Ronaldo ha dapi passa in decenni fatg tut il pussibel per ina giada manar ses Portugal sin il tron. Bleras giadas èn ils Portugais stads datiers dal triumf, tanschì hai fin l’EURO 2016 dentant mai.
24 equipas – per blers damemia
Il grond victur sper il Portugal èn la pitschnas naziuns sco l’Islanda, la Valisa u l’Ungaria ch’han giugà cun corp ed olma e procurà per gronda euforia en lur pajais. Grazia al nov modus cun 24 equipas han quellas equipas er gì la schanza da sa preschentar al campiunadi d’Europa.
L’augment dal dumber d’equipas da 16 sin 24 ha dentant er purtà vuschs criticas. Blers gieus, oravant tut en la fasa da gruppa n’èn uschia betg stads attractivs. Ils pitschens han savens giugà fitg defensiv per uschia er vegnir da gudagnar in u l’auter punct encunter ils gronds ed uschia salvar la schanza da far il pass en la fasa da K.O. Da 24 equipas èn 16 equipas sa qualifitgadas per l’otgavelfinal, per blers experts da memia.
Turnier sut grevas circumstanzas
In laud merita perencunter l’organisatur, la Frantscha. Sco gia ils ultims gronds turniers en l’agen pajais han ils Franzos er questa giada sa mussà da lur meglra vart e procurà per ina festa da ballape. Las circumstanzas n’èn dentant betg stadas simplas il 2016. Davent da l’entschatta ha la tema d’acts da terrur accumpagnà quest turnier. La Frantscha è stada sfurzada d’engaschar blera polizia e far bleras controllas.
Concept da segirezza in success
Ord vista da las forzas da segirtad franzosas èn ils campiunadis europeics da ballape stads in success. La Frantscha haja mussà ch'ella saja abla d'organisar ina manifestaziun gronda. Las attatgas terroristicas dals davos mais hajan bain fatg gronds fastidis, ma i na saja capità nagut sumegliant, ha ditg il minister da l'intern Bernard Cazeneuve.
El ha ludà la lavur dals passa 120’000 policists, schuldads e persunas da segirtad privatas. Tenor Cazeneuve hajan ins arrestà durant ils campiunadis europeics passa 1’500 persunas. 64 da quellas sajan vegnidas messas ord il pajais.
Il campiunadi d’Europa 2016 n'entra betg en l’istorgia sco il meglier e fitg attractiv turnier, dentant cun ina premiera. Cun il Portugal ha ina naziun gudagnà il titel che n'aveva anc mai triumfà ad in grond turnier da ballape.
RR actualitad 11:00