Ils Svizzers èn sa defendids bain e da tutta forza, cunter ina ferma squadra franzosa. Ils Franzos han tranter auter sajettà 3 giadas il bal en la latta, Paul Pogba en la 12avla ed en la 17avla minuta, e Dimitri Payet en la 75avla minuta.
L'offensiva fa mal il venter
La squadra svizra è bain vegnida in per giadas malsegir avant il gol franzos, dentant era en il terz gieu da questa Euro na persvada l'offensiva svizra betg. Quai malgrà ch'il trenader Vladimir Petkovic ha laschà giugar l'attatgader Breel Embolo enstagl da Haris Seferovic, quel è lura vegnì en il gieu en la 74avla minuta.
Puschmaun è l'adversari enconuschent
Cun quest pari daventa la Svizra segunda en la gruppa C, e cuntanscha uschia ord atgna forza l'otgavelfinal. E là frunta la naziunala u sin l'Irlanda dal nord, sin la Pologna u sin la Germania, questa decisiun croda il mardi che vegn. Quest otgavelfinal ha lieu sonda proxima ils 25 da zercladur da las 15:00 a St-Etienne.
L'Albania ha anc schanzas
En il segund gieu da questa gruppa ha l'Albania battì la Rumenia cun 1:0. Quai è l'emprim gol che l'Albania ha insumma sajettà tar ina Euro, ed ils emprims trais puncts recaltgads.
Sajettà il gol ha Armando Sadiku, attatgader dal FC Vaduz, ed uschia ha l'Albania era anc schanzas per l'otgavelfinal. Per la Rumenia è l'Euro percunter a fin, malgrà la buna situaziun suenter il pari cunter la Svizra.
RR novitads 23:00