Gia suenter 1:40 minutas han ils Polacs manà cun 1:0 suenter in gol da l'attatgader Robert Lewandowski. Cun quai è gartegià a l'attatgader da Bayern München il gol il pli spert da quest campiunadi - ed il segund spert en l'istorgia dal campiunadi europeic insumma.
En la 33avla minuta però han ils Portugais pudì egalisar. Renato Sanches ha sajettà il 1:1. Ses culp è anc vegnì devià, uschia ch'il goli dals Polacs n'ha gì nagina schanza. Sanches vegn ad esser collega d'equipa da Lewandowski tar Bayern München a partir da la proxima stagiun.
Nagina decisiun suenter 120 minutas
Suenter che l'emprima mesadad da la partida è stada gulivada, ha il Portugal dominà la segunda mesadad. Cunzunt Cristiano Ronaldo ha gì pliras bunas schanzas. Tuttina n'èsi betg reussì als Portugais da sajettar in segund gol, uschia che la partida è ida en la prolungaziun.
Perquai ch'i n'ha era dà nagins ulteriurs gols suenter 120 minutas, han ils penaltis stuì decider tgenina da las duas equipas sa qualifitgescha per il mezfinal.
Penaltis decidan en favur dal Portugal
La fin finala han ils Portugais gudagnà suenter sajettar penaltis cun 4:6. Cun excepziun da Jakub Blaszczykowski han tuts fatg lur penalti. Il goli dals Portugais, Rui Patricio ha tegnì il culp dal Polac ch'è uschia daventà la figura tragica da questa partida.
En il mezfinal dals 06-07-2016 a Lyon frunta il Portugal u sin la Belgia u sin la Valisa. La Pologna è per l'emprima giada insumma sa qualifitgada per in quartfinal ad in campiunadi europeic. En l'otgavelfinal han ins Polacs battì la Svizra. Quai er suenter sajettar penaltis.
RR novitads 23:00