Al campiunadi europeic da ballape cuntinuescha il siemi per la squadra da la Valisa. Ella gudogna surprendentamain cler il quartfinal cunter la Belgia cun 3:1.
Ils Beltgs èn ids en avantatg en la 13avla minuta tras in culp ord la distanza dal giugader dal champ central Radja Nainggolan. En la 30avla minuta ha il capitani Ashley Williams pudì egalisar per la Valisa al 1:1. El ha nizzegià in mument da confusiun en la defensiun dals Beltgs.
audio
Bunura: Bonjour France - rapport dal gieu Valisa - Belgia
01:21 min, ord Actualitad dals 02.07.2016.
laschar ir. Durada: 1 minuta 21 Secundas.
Segunda mesadad
En la 55avla minuta ha Hal Robson-Kanu tutgà al 2:1 per l'equipa da la Valisa. Il giugader dal champ central ha trumpà la defensiun beltga. Tut cler ha fatg l'attatgader Sam Vokes cun ses 3:1 en la 86avla minuta. La sensaziun è perfetga.
En il mezfinal spetga Portugal
Mesemna, ils 6 da fanadur gioga la Valisa il mezfinal cunter il Portugal che ha battì la Pologna suenter sajettar penaltis. Sulet dagut d'amarezza per la Valisa: Aaron Ramsey manchenta il mezfinal pervi da duas cartas melnas.