Nagina schanza ha la Russia gì, la naziunala russa ha pers cun 0:3 cunter il Wales. Ed il success da Wales è stà merità era en questa dimensiun, els han dominà la Russia davent da l’emprima minuta. Entant ch’il Wales finescha uschia la fasa da gruppa a la testa dal classament, resta a la Russia in sulet punct or dal gieu cunter l’Engalterra.
In auter purtret è stà da vesair tar la partida tranter la Slovachia e l'Engalterra ch’è ida a fin pari 0:0. Cun sis novs giugaders han ils Englais armonisà bain ed han gì il gieu sut controlla. Dentant la balla n’ha betg vulì ir en il gol dals Slovacs, duas giadas hai mancà pauc ed in sajet ha in Slovac anc pudì sviar sin la lingia.
RR novitads 23:00