L’um dal gieu è stà Antoine Griezmann. L’attatgader d’Atlético Madrid ha sajettà omadus gols per ils Franzos. Il 1:0 ha Griezmann tutgà per penalti en la davosa secunda avant pausa. Il capitani da la Germania, Bastian Schweinsteiger, aveva giugà la balla cun il maun. En la 72avla minuta ha Griezmann procurà cun il 2:0 per la decisiun. El ha nizzegià in sbagl en la defensiun dals Tudestgs.
Tut en tut ha Antoine Griezmann ussa gia tutgà 6 giadas a quest turnier da chasa. El è uschia sin buna via da daventar il meglier tiragols da l’EURO 2016.
Germania senza cletg
Per la Germania è il turnier pia a fin. Malgrà che l’equipa da Joachim Löw ha gì dapli dal gieu n’èn ils Tudestgs betg stads effizients avunda avant il gol e fatg dus sbagls memia bler en la defensiun. A la fin han ils Tudestgs fatg tut il pussibel e per part schizunt giugà powerplay encunter ils Franzos, quai dentant senza success. La Frantscha che vegn trenada da Didier Deschamps ha gì il cletg da sia vart ed uschia er fatg revantscha per la terrada da 0:1 en il quartfinal dal campiunadi mundial il 2014 en la Brasilia.
Uss manca als Franzos anc ina victoria per dastgar tegnair il buccal enta maun, sco quai ch’els han gia fatg al davos campiunadi d’Europa en Frantscha il 1984 ed al campiunadi mundial il 1998.
Frantscha en la rolla da favurit
En il final da l’EURO 2016 vegni dumengia saira, ils 10 da fanadur, a las 21:00 uras tar il duel tranter la Frantscha ed il Portugal. Ils Franzos valan sco favurits en quest final, oravant tut er grazia a l’offensiva cun Antoine Griezmann, Olivier Giroud, Dimitri Payet e Paul Pogba. Il Portugal da l’auter maun ha il superstar Cristiano Ronaldo en l’equipa ch’è adina bun per procurar per la differenza. Il final tranter «Les Bleus» ed ils Portugais è en il Stade de France a Saint-Denis.
RR actualitad 07:00