Siglir tar il cuntegn

UEFA EURO 2016 Naginas midadas tar la Svizra

Il trenader da l’equipa naziunala Vladimir Petkovic n’ha fatg naginas midadas cumpareglià cun l'emprim gieu. Breel Embolo sto uschia a l’entschatta puspè star sin banc.

equipa el trenament a Paris
Legenda: La Svizra va cun ils medems 11 giugaders en il secund gieu da gruppa sco en igl emprim gieu cunter l'Albania. Keystone

Il grond segn da dumonda è stà sche Petkovic vegnia a laschar giugar Breel Embolo enstagl d'Admir Mehmedi, ni era enstagl da Haris Seferovic. Ni sch’i dettia schizunt duas midadas: Embolo enstagl Mehmedi ed Eren Derdiyok enstagl Seferovic. Mo uss èsi cler: Il trenader na fa insumma naginas midadas. Igl è l’emprima giada che Petkovic lascha giugar duas giadas ina suenter l’autra exact la medem'equipa.

Il gieu tranter la Svizra e la Rumenia pudess gia esser decisiv pertutgant la qualificaziun per ils otgavelfinals. Gudagna la Svizra, lura è ella gia qualifitgada definitivamain per ils otgavelfinals.

Il gieu cumenza a las 18:00. Il Radio Rumantsch rapporta en in’emissiun speciala direct da Paris dal gieu tranter la Svizra e la Rumenia.

RR novitads 20:00