Siglir tar il cuntegn

UEFA EURO 2016 Portugal emprim finalist a l’EURO

Il Portugal ha cuntaschì il final al campiunadi d’Europa en Frantscha. Ils Portugais han battì en l’emprim mezfinal la Valisa cun 2:0. Ils gols a Lyon han sajettà Cristiano Ronaldo en la 50avla minuta e Nani en la 53avla minuta.

Cristiano Ronaldo
Legenda: Cristiano Ronaldo è stà l’um dal gieu en il mezfinal cunter la Valisa. Keystone

Il Portugal sa qualifitgescha per la segunda gia per in final d'in campiunadi d’Europa. Gia il 2004 vevan ils Portugais cuntanschi il final al turnier da chasa, lura dentant pers quel encunter la Grezia. Malgrà ch’il Portugal n’ha betg adina persvadì a l’EURO en Frantscha è la qualificaziun per il final meritada. Oravant tut suenter la pausa èn ils Ibers stads pli ferms ch’ils Valis, ed oravant tut er pli effizients.

CR7 procura per la differenza

L’um ch’ha procurà per la differenza è stà il superstar dal Portugal, Cristiano Ronaldo. Curt suenter la pausa ha el sajettà cun il tgau il 1:0 suenter in corner. Be trais minutas pli tard ha CR7 dà il pass decisiv a Nani ch’ha procurà cun il 2:0 per la decisiun.

Cun ses gol encunter la Valisa ha Cristiano Ronaldo ussa gia tutgà 9 giadas a campiunadis d’Europa ed uschia egualisà il record da Michel Platini ch’ha medemamain sajettà 9 gols.

Ballapedist.
Legenda: Gareth Bale applaudescha als fans. Keystone

Ronaldo gudogna duel cunter Bale

Il siemi da la Valisa è a fin. En il mezfinal ha mancà als Valis la qualitad per batter il Portugal. Er al star da la Valisa, Gareth Bale, n’èsi betg gartegià da volver il gieu en la dretga direcziun.

Plinavant ha la Valisa sentì fitg la mancanza dad Aaron Ramsey ch’ha stuì guardar il gieu davent dal baun da reserva. Il giugader d’Arsenal è stà serrà suenter duas cartas melnas. Cun quai ha Gareth Bale er pers il duel cunter ses collega d’equipa tar Real Madrid, Cristiano Ronaldo.

Frantscha u Germania

En il final frunta il Portugal sin in grond caliber, numnadamain sin il victur dal duel tranter la Frantscha e la Germania. Omaduas equipas tutgan dapi l’entschatta dal turnier tar ils gronds favurits. Ils Franzos dastgan giugar davant ils fans da chasa e possedan gronda classa en l’offensiva. La Germania ha persvadì sco equipa ed è actualmain er il campiun mundial.

RR novitads 23:00