L’equipa che gudogna quest davos gieu da gruppa va sco victur da gruppa en la fasa da k.o.
Cun in pari pudess la naziunala svizra sa qualifitgar definitiv per l’otgavelfinal e na stuess betg pli tremblar da stuair turnar a chasa gia suenter la fasa da gruppa. Plinavant vul la Svizra er far ina revantscha per la terrada encunter ils Franzos avant dus onns en la Brasilia. Al campiunadi mundial il 2014 avevan ils Franzos battì ils Svizzers gist cun 5:2.
Buna figura en ils emprims dus gieus
En ils dus emprims gieus da gruppa cunter l’Albania (1:0) e cunter la Rumenia (1:1) ha l’equipa da Vladimir Petkovic fatg ina buna figura. Il sulet manco: ils Svizzers n’èn betg stads effizients avunda avant il gol. Oravant tut l’attatgader Haris Seferovic ha manchentà numerusas schanzas. Pussibel che Petkovic fa perquai intginas midadas questa saira a las 21:00 uras encunter la Frantscha.
Defensurs franzos na persvadan betg
Ils Franzos che vegnan trenads dal campiun mundial dal 1998, Didier Deschamps, han gudagnà omadus gieus da gruppa fin ussa, quai dentant be piz a cup. Oravant tut ils defensurs franzos n’han anc betg persvadì dal tut.
Triumf da tennis - triumf da ballape?
Tar il davos spectacul da sport Svizra encunter Frantscha en il Stade Mauroy a Lille ha la Svizra triumfà. En il final da la cuppa Davis vevan Roger Federer e Stan Wawrinka battì ils Franzos e procurà per ina triumf istoric. Tgi sa, forsa è quai in bun omen er per la naziunala svizra da ballape.
