Jovian Hediger e Roman Furger èn vegnids segunds en il sprint da team da skating a Ulricehamn en Svezia. Pli spert ch’il duo svizzer èn be stads ils Talians De Fabiani / Pellegrino. En l’arrivada han ils Svizzers gì in avantatg d’ina mesa segunda sin ils Svedais.
Roman Schaad ed Erwan Käser han era mussà ina ferma prestaziun. Els han la fin finala dentant stuì sa cuntentar cun il rang 8.
Era plaz da podest per las dunnas
Nadine Fähndrich e Laurien van der Graaff èn vegnidas terzas davos la Slovenia e la Svezia. En il sprint final ha Fähndrich tranter auter distanzià l’Americana Jessie Diggins.
