Ils svizzers na persvadan er betg en il segund gieu da test
L'equipa naziunala svizra n'ha betg pudì mussar ina reacziun sin la terrada da 0:1 a Dublin encunter l'Irlanda. Suenter quest gieu eran ils Svizzers vegnids crititgads d'avair mussà memia pauc engaschament e creativitad durant il gieu.
Bler meglra critica n'hai er betg dà suenter il gieu da chasa encunter la Bosnia-Erzegovina. Malsegirs en la defensiun e betg effectivs en l’attatga, uschia il facit. Quai ha era il trenader naziunal Vladimir Petkovic constatà suenter la partida. Dentant spera Petkovic ch'ils giugaders che n’èn anc betg fits, tranter auter Xherdan Shaqiri, sajan en furma en dus mais cura ch'il campiunadi d'Europa cumenza en Frantscha.
Bosniacs pli effectivs
En il gieu da test en il Letzigrund a Turitg ha il gieu cumenzà cun ina buna schanza da Haris Seferovic. Suenter bun in quart ura lura dentant l'emprima duscha fraida per ils Svizzers.
Il capitani Edin Dzeko ha cun ina buna acziun pudì sajettar il 1:0 per la Bosnia-Erzegovina. En la 57avla minuta ha lura Miralem Pjanic fatg tut cler cun ses gol al 2:0.
Cun in culp liber ord ina distanza da bun 20 meters n'ha Pjanic laschà nagina schanza al goli svizzer Yann Sommer. Curt avant la fin ha Seferovic gì ina buna schanza d'almain scursanir il resultat, ma er questa schanza n'ha l'attatgader d'Eintracht Frankfurt betg pudì nizzegiar.
Anc dus gieus da test
Schanza da far meglier survegn la naziunala Svizra da ballape durant il camp da trenament curt avant che partir direcziun Frantscha. La sonda, ils 28 da matg, dattan ils Svizzers a Genevra encunter la Belgia, l'actual numer 1 dal mund. Paucs dis pli tard, ils 3 da zercladur, suonda lura il davos gieu da test a Lugano encunter la Moldavia. Bun in’emna pli tard cumenza lura il campiunadi d'Europa. En la fasa da gruppa frunta la Svizra sin l'Albania (11-06), sin la Rumenia (15-06) e sin la Frantscha (19-06).
Gieu da test squadras naziunalas da ballape (29-03-2016)
Gieu | Resulta |
Svizra - Bosnia-Erzegovina | 0:2 (0:1) |
Ulteriurs gieus da test | Resultat |
Montenegro – Bielorussia | 0:0 (0:0) |
Estonia – Serbia | 0:1 (0:0) |
Macedonia - Bulgaria | 0:2 (0:0) |
Georgia – Kasachstan | 1:1 (1:1) |
Grezia - Islanda | 2:3 (2:1) |
Norvegia – Finlanda | 2:0 (0:0) |
Gibraltar – Lettonia | 0:5 (0:0) |
Luxemburg – Albania | 0:2 (0:0) |
Svezia – Tschechia | 1:1 (1:1) |
Austria – Tirchia | 1:2 (1:1) |
Germania – Italia | 4:1 (2:0) |
Irlanda - Slovachia | 2:2 (2:2) |
Portugal – Belgia | 2:1 (2:0) |
Scozia – Danemarc | 1:0 (1:0) |
Engalterra – Ollanda | 1:2 (1:0) |
Frantscha – Russia | 4:2 (2:0) |