La stagiun dad unihockey è interrutta per immediat – e quai per tut las ligas. Tenor l’Associaziun svizra dad unihockey na vegni betg pli giugà fin la fin da november. Swiss Unihockey reagescha uschia sin il dumber dals cas da corona – che crescha ferm. Questa fin d’emna fissan stadas bunamain 1’000 partidas dad unihockey sin il program.
Tge che questa interrupziun munta per la stagiun currenta, vegn examinà ils proxims dis. Influenza sin quai vegnan er ad avair las proximas mesiras da chantuns e Confederaziun.
Interrupziun era tar ballarait
Il campiunadi regiunal da ballarait vegn ad interim davent ils 25 d’october fin almain ils 8 da november 2020 interruts. La suprastanza da Swiss Volley regiun GSGL ha tratg questa decisiun pervi da la situaziun actuala da Covid-19. Las differentas applicaziuns en ils chantuns portia gronda malsegirtad tar la planisaziun dals gieus. L’interrupziun pertutgia las ligas activas sco era las ligas dals juniors. Sco e cura ch’ils campiunadis vegnan ad avair lieu dependa dal svilup da la pandemia e da las ulteriuras mesiras da Confederaziun e chantuns.