Siglir tar il cuntegn

Header

Navigaziun

La giugadra da tennis Belinda Bencic.
Legenda: Per Belinda Bencic è la victoria cunter Naomi Osaka in dals pli gronds success da sia carriera. Reuters
cuntegn

US Open Bencic procura per sensaziun cunter il numer 1 dal mund

Cunter Naomi Osaka ch'è era la defensura dal titel – gudogna Belinda Bencic en ils otgavelfinals en dus sets, cun 7:5 e 6:4. La proxima adversaria è lamesemna – u la Croata Donna Vekic u la Tudestga Julia Görges.

La Giapunaisa ha cumenzà cun grond tempo la partida, Belinda Bencic ha dentant pudì tegnair cunter. La Svizra ha bain manchentà a l'entschatta da realisar trais schanzas per ir en avantatg cun 3:0. Suenter il segund break al 6:5 en l'emprim set n'ha ella dentant betg pers las gnervas.

En il segund set gartegia a Bencic il sulet break al 3:2. Suenter ha Osaka clamà il medi sin il plaz, ella aveva avant il turnier problems cun la schanuglia. La partida è dentant ida vinavant sco avant la pausa. E suenter in'ura e 27 minutas nizzegia Belinda Bencic gia l'emprima balla da matsch a la victoria nunspetgada.

Legenda: Guardar il video Ils puncts culminants da Bencic cunter Osaka. Durada 01:19 minutas.
Or da sportlive dals 02.09.2019.

Ina da las adversarias preferidas

Dal tut ina surpraisa n'è la victoria da Belinda Bencic betg. La Svizra da 22 onns gudogna gia per la terza giada en quest onn, suenter Indian Wells e Madrid, cunter il numer 1 dal mund, Naomi Osaka.

RR novitads 20:00