«Nus n'avain betg giugà bain las emprimas minutas», declera il defensur engiadinais Davyd Barandun la sconfitta. Suenter gnanc otg minutas eran ils Svizzers numnadamain gia en retard cun 0:4 cunter ils Finlandais. En la 17avla minuta ha Philipp Kuraschew sajettà il sulet gol per l'equipa svizra e scursanì il resultat sin 1:4. Il decurs dal segund e terz terz han ils Finlandais anc pudì far dus ulteriurs gols.
Davyd Barandun è tuttina optimistic per il final pitschen cunter ils russ: La medaglia da bronz saja realistica.
Era il directur da l'equipa naziunala da hockey, Raeto Raffainer, è optimistic: «Giugar anc ina giada 60 minutas in bun hockey e lura avain nus questa medaglia». L'engiadinais è dentant era superbi da quai che l'equipa ha gia prestà enfin uss. Quai saja da gronda impurtanza per l'entir hockey svizzer.
Il gieu per la medaglia da bronz al campiunadi da hockey U20 giogan ils svizzers sonda saira las 22.00 uras cunter la Russia.
RR novitads 06:00