Siglir tar il cuntegn

Naziunal/Internaziunal Vaduz dat giu laterna cotschna

Cun 0:1 ha l'FC Vaduz gudagnà cunter Sion en il stadio Tourbillon. Il sulet gol dal gieu ha sajettà Kukuruzovic en la 74avla minuta. Vaduz surdat uschia la laterna cotschna a l'FC Lugano. Era il derbi bernais tranter l'FC Thun ed ils Young Boys è i a fin cun 0:1 per ils Bernais da la citad.

dus giugaders da ballape
Legenda: Stjepan Kukuruzovic (Vaduz, cotschen) na lascha betg surpassar Reto Ziegler (Sion, alv) Keystone

Lucerna ha gudagnà per l'emprima giada a chasa en questa stagiun. Cunter l'FCZ ha il club da Markus Babbel gudagnà cun 1:0.Lucerna ha uschia tuttina blers puncts sco YB (18 pcts) ed è sin plazza 4.

Vaduz ha fatg in pass enavant sin plazza 7 cun 9 puncts. Sion resta sin plazza 5 cun 14 puncts. Turitg, Thun e Lugano han tuts 7 puncts ed èn sin las ultimas plazzas da la tabella.

Premiera per Bjarnason

giugader da basilea sa legra da ses gol, davostiers il goli e dus giugaders da Lugano
Legenda: Premiera per Birkir Bjarnason, el ha sajettà ses emprim gol en la Super League. Keystone

Ier saira ha l'FC Basilea festivà la 9avla victoria da questa stagiun. Il campiun svizzer ha gudagnà a chasa cun 3:1 cunter Lugano. Luca Zuffi ha sajettà dus gols ed ina premiera hai dà per l'Islandais Birkir Bjarnason, el ha sajettà ses emprim gol per l'FCB.

En il segund gieu d'ier saira han GC e l'FC Son Gagl giugà pari 1:1. En la tabella ha uschia l'FC Basilea engrondì l'avantatg sin GC sin 6 puncts.

RR novitads 16:00