Per Nadine Fähndrich n'èsi oz betg ì sco planisà. En la segund davosa etappa al Tour de Ski è Fähndrich crudada or suenter ils mezfinals. Per Laurien Van der Graaff è il sprint gia stà a la fin suenter il quartfinal. Gudagnà la cursa ha la Svedaisa Linn Svahn, la dominatura dal sprint da questaa stagiun. En il classament general maina vinavant l'Americana Jessie Diggins.
Er tar ils umens hai dà entras Oskar Svensson ina victoria svedaisa. Svensson ha en il final battì lev surprendentamain il duo russ enturn Gleb Retivykh e Alexander Bolshunow. Roman Furger era gia crudà or suenter il quartfinal, Candide Pralong en il mezfinal.
Dario Cologna n'ha betg prendì part
Dario Cologna aveva decis da desister sin il quartfinal dal sprint ed uschia sin secundas da bonus al Tour de ski en la concurrenza da sprint a Val di Fiemme. Cologna è sa qualifitgà per ils quartfinals sco 17avel. Las temperaturas bassas dals ultims dis hajan strapatschà ses pulmun. Per pudair esser damaun cumplainamain efficazi a l'ascensiun sin l'Alpe Cermis, vul Cologna nizzegiar il suentermezdi da la sonda per la regeneraziun.
