Siglir tar il cuntegn
cuntegn

Naziunal/Internaziunal Valon Behrami betg pli en la naziunala

Sin twitter ha Behrami scrit il glindesdi saira, ch'el na tutgia betg pli a la naziunala svizra da ballape. Avant aveva il trenader da la naziunala Vladimir Petkovic telefonà cun el, sco Behrami ha ditg en in'intervista cun la televisiun tessinaisa RSI.

Valon Behrami ha giugà 83 partidas per l'equipa naziunala.
Legenda: Valon Behrami ha giugà 83 partidas per l'equipa naziunala. Keystone

Pli tard ha la Federaziun svizra da ballape lura annunzià, ch'il trenader Vladimir Petkovic planiseschia da testar giuvens giugaders en ils gieus da l'atun. Ed il trenader haja sulet infurmà il glindesdi plirs giugaders rutinads, ch'el veglia laschar giugar l'atun intgins giuvens, sco la Federaziun svizra da ballape scriva. Vitiers haja el discutà cun ils giugaders lur futur sportiv

Quest telefon da Vladimir Petkovic ha Valon Behrami para chapì uschia, ch'el na saja nagin tema pli per la naziunala. Uschia ha el scrit il glindesdi saira sin Twitter «Mia carriera internaziunala è a fin.».

Behrami ha giugà 83 partidas per l’equipa naziunala svizra e marcà dus gols. En tut è el stà da la partida a quatter campiunadis mundials e dus campiunadis europeics.

RR novitads 20:00