Stefan Küng da la Turgovia ha gudagnà a moda suverana la cursa cunter l'ura, sur ina distanza da 25,6 kilometers. En media è el charrà passa 50 km/h. Ed uschia ha el distanzià il Franzos Rémi Cavagna per 17 secundas, e Victor Campenaerts per 21 secundas.
L'onn passà era Stefan Küng daventà quart en la cursa cunter l'ura tar ils campiunadis europeics, ed aveva manchentà mo per paucs tschientavels la medaglia da bronz.
Segund plaz per Stefan Bissegger
Stefan Bissegger ha gudagnà argient dals campiunadis europeics dals U23 a Plouay en la Frantscha. En la cursa cunter l'ura è mo il Norvegiais Andreas Leknessund stà pli svelt ch'il cicilist da la Turgovia.
En la medema categoria era Bissegger gia vegnì avant in onn terz en la cursa cunter l'ura e segund en la cursa da velo sin via.
Reusser va per Bronz
Tar las dunnas ha Marlen Reusser fatg bronz en la cursacunter l'ura sur 25,6 kilometers. Per la Bernaisa èsi la pli gronda victoria enfin uss.