Victoria dubla svizra en il Moto 2 a Misano

Dominique Aegerter e Tom Lüthi cun victoria dubla tar il GP San Marino. Il manader dal campiunadi mundial Franco Morbidelli è crudà ora.

Al Grond Premi da San Marino han ils dus svizzers Dominique Aegerter e Tom Lüthi procurà per ina surpraisa: A Misano ha gudagnà Dominique Aegerter avant ses cumpatriot Tom Lüthi. Quai è la prima giada insumma che la Svizra po festivar ina victoria dubla en la categoria da Moto 2.

Segunda victoria per Aegerter

Per Aegerter èsi la segunda victoria da sia carriera suenter il 2014 en Germania. Il Bernais n'ha fatg nagins sbagls sin la pista bletscha.

Lüthi vinavant en campiunadi mundial

Tom Lüthi è cun quest segund rang la 10avla giada sin il podest. Grazia als 20 puncts da quest segund plaz è Lüthi be pli 9 puncts davos il leader dal campiunadi mundial, il Talian Franco Morbidelli. Lez era crudà ora en la quarta runda. Quai 5 cursas avant la fin da la stagiun.

Il terz Svizzer, Jesko Raffin è daventà 10avel. Era el cun ina cursa senza sbagls.

RR novitads 14:00