Bun 21 uras suenter la partida cunter il Team Canada èsi puspè stà serius per il Club da Hockey da Tavau. En lur segund gieu a la Cuppa Spengler èn els fruntads sin ils Ice Tigers da Nürnberg.
L'entschatta dal gieu ha cumenzà fitg bain per ils da Tavau. Gia suenter 7 minutas han ils da Tavau manà cun 2:0, grazia als gols dad Inti Pestoni e Dario Simion. Vers la fin dal segund terz han dentant ils da Nürnberg pudì scursanir ed en l'ultim terz han els perfin pudì egualisar al 2:2. Il pli giuven da l'equipa, Julian Payr ha lura pudì spendrar la partida cun sajettar il 3:2. Er il goli da Tavau, Gilles Senn è stà en furma. El ha pudì lavagar inqual schanza dals Ice Tigers cun sias paradas.
KalPa Kuopio gudogna cun 3:1 cunter Oceláři Třinec
En il terz gieu da la Cuppa Spengler èn duas squadras novizas a la Cuppa Spengler fruntadas ina sin l'autra. KalPa Kuopio da la Finlanda ha gudagnà la partida a moda suverana cunter la squadra da la Tschechia Třinec e quai cun 3:1. Il debutant tschec a la Cuppa Spengler ha uss mo anc la pussaivladad da restar via quartfinals en il turnier. Ils Finlandais percunter dattan il venderdi suentermezdi a Tavau cunter Magnitogorsk per la via directa en ils mezfinals.
Cuppa Spengler 2018
RR novitads 18:00++