Siglir tar il cuntegn

Header

cuntegn

Violenza tar il ballape Agressiun e violenza tar mintga segund gieu

Tar 46% da tut las partidas en la Super League datti violenza. Quai resulta d’in rapport, ch'è vegnì preschentà da la plattafurma da coordinaziun sport da la polizia. Il fazit a la conferenza da medias da la Swiss Football League e la conferenza dals directurs e las directuras chantunalas da giustia e polizia è stà cler:

I na dat nagut dad embellir: 46% èn simplamain da memia.
Autur: Paul Winiker directur da giustia e segirezza (LU)

Il rapport è vegnì fatg per l'emprima giada insumma. Per vegnir al resultat sajan vegnids analisads tut ils 457 gieus da la stagiun 2018/2019, scriva l'agentura da novitads svizra SDA.

La statistica mussa ch'i dettia sin via al stadion pli gronds problems che en ils stadions sezs. Per il solit sajan il fans da l’equipa che gioga ordaifer la culpa.

Donns e piros, bloccadas da trens ed attatgas

Tar ils acts da violenza datti in inter register da renfatschas: Da donns vi da trens e trair il frain d'urgenza fin ad acts da violenza cunter polizistas e polizists u persunal da tren e hurschas cun fans adversaris.

In nov fenomen saja che las gruppas da fans adversarias a Turitg hajan er ina sort da charplina da bandas er dador ils gieus.

Concordat da hooligans vegn evaluà

Uss duaja vegnir evaluà il concordat da hooligan, pretendan ils directurs e las directuras chantunalas da giustia e polizia. Quel concordat porschas tenor ellas ed els dapli pussaivladads che quellas che vegnan nizzegiadas per cumbatter la violenza.

Mesiras immediatas cunter la violenza

Avrir la box Serrar la box

Fin ch'il concordat da hooligans ed il rapport en chaussa è finì vegn quai a gnir primavaira 2020. Per pudair agir gia avant datti mesiras immediatas cunter la violenza tar il sport:

  • I vegn creada ina conferenza dals schefs da polizia da segirtad per coordinar las forzas da la polizia involvidas.
  • I dà spert e consequent scumonds da stadion tras ils clubs e la Swiss Football League.
  • Ils process per identifitgar e sancziunar persunas violentas vegnan intensivads e standardisads.
  • I da in «Hooli-Alarm» tar svilups ed acziuns grevas.
  • I vegn evaluà dad identifitgar visitadras e visitaders dals gieus, dad avair tickets persunalisads u da congualar cartas d'identitad cun la banca da datas da hooligans.

RR novitads 14:00

Artitgels legids il pli savens