Siglir tar il cuntegn

Naziunal/Internaziunal Vonn gudogna ultima cursa rapida da la stagiun

Lindsey Vonn gudogna al final da la Cuppa mundiala ad Are l'ultima cursa rapida da l'enviern. Il cumbat per la culla pitschna da cristal en questa categoria perda l'Americana dentant. La culla gudogna la Taliana Sofia Goggia.

La skiunza Lindsey Vonn sa legra da la victoria
Legenda: Lindsey Vonn gudogna l'ultima cursa rapida da la stagiun, perda dentant la culla pitschna. Keystone

Lindsey Vonn ha uschia gia gudagnà 82 cursas da la cuppa mundiala e vegn adina pli datiers dal record dal Svedais Ingemar Stenmark cun 86 victorias.

La victura olimpica Sofia Goggia è vegnida segunda, be sis tschientavels davos Vonn. Uschia ha ella pudì gudagnar la culla pitschna da la disciplina cun in avantatg da trais puncts. Goggia gudogna per l'emprima giada ina culla da cristal pitschna.

La Grischuna Jasmine Flury ha mussà sia meglra cursa rapida da la stagiun ed è meglra Svizra. Ella è vegnida tschintgavla ed ha pers sulet 9 tschientavels sin il podest. L'entschatta enviern ha Flury gudagnà si'emprima cursa en la cuppa mundiala, il Super-G a San Murezzan.

RR novitads 14:00