Igl è stà in final sin aut nivel, nua che Stan Wawrinka ha mussà ch’el po en buna furma batter mintga giugader dal mund. En l'emprim set ha il Svizzer anc stuì sa suttametter al nummer 1 dal mund.
Cun blera pressiun al success
Suenter ha el fatg gronda pressiun davent da la lingia da basa. Questa pressiun è Wawrinka vegnì da trair atras enfin la victoria.
Igl è stà il gieu da mia vita.
Sulet en il 4. set hai dà ina situaziun precara. Stan Wawrinka ha manchentà cunter la fin dal set da nizzegiar 2 schanzas da break. Suenter è Djokovic da sia vart vegnì tar 3 schanzas da break ina vid l’autra. In 5. set pareva fitg probabel. Mo il Svizzer è stà fitg ruassaivel e suveran, ha defendì tut las schanzas da break e ha lura sez prendì giu il service al Serb Novak Djokovic – la decisiun.
Jau hai grond respect per tai. Ti meritas il titel.
Vinavant nagin titel a Paris per Novak Djokovic
Wawrinka ha cun questa victoria a Paris gudagnà suenter l'Australian Open ses 2. titel da Grand Slam. Djokovic sto perencunter vinavant spetgar sin ina victoria al turnier Roland Garros. Igl è il sulet titel da Grand Slam che manca anc a l'actual nummer 1 dal mund.
RR novitads 17:00