Siglir tar il cuntegn
cuntegn

Naziunal/Internaziunal YB ha pers cunter ManU

Ils Bernais n'han betg pudì nizzegiar lur emprima schanza en la fasa da gruppa. Els han pers cun 0:3 cunter Manchester. Il captain da Manchester United, Paul Pogba po segnar per sasez dus gols ed in assist.

Purtret dals dus giugaders.
Legenda: Mbabu e Martial s'embratschan suenter il gieu da la Champions League. Keystone

Gia en l'emprima mesadad han il umens da Manchester United pudì decider il gieu per els. En la 35avla minuta ha Paul Pogba tutgà l'emprima giada en il chantun. Curt avant era in'emprova ensemen cun Anthony Martial betg gartegiada. Ma Pogba ha anc dà suenter.

Penalti dispitaivel per ils osps

Curt avant la mesadad ha il capitani tutgà in penalti. Er qua en il chantun sura. L'arbiter ha gì vis in hands da Kevin Mbabu. Ils aspectaturs dal Stade de Suisse èn stads d'in auter avis.

Ma il pli tard en la 66avla minuta èsi stà cler. Il Franzos Anthony Martial ha tutgà cun agid da Pogba al 3:0.

Charta cotschna per Ronaldo en il gieu da Juve cunter Valencia

Il debut da Cristiano Ronaldo per Juventus Turin è stà curt. En la 29avla minuta ha el survegnì da l'arbiter ina charta cotschna. Quai pervi d'in duel cun Jeison Murillo: Suenter che quel era crudà giun plaun aveva Ronaldo tschappà el ed ha stuì incassar perquai directamain la charta cotschna pervi da violenza.

Gudagnà ha Juventus Turin tuttina. Quai cun 2:0. Miralem Pjanic ha tutgà duas giadas grazia a penaltis.

Ils ulteriurs resultats

  • Ajax Amsterdam 3:0 AEK Athen
  • Benfica Lissabon 0:2 Bayern München
  • Schachtar Donezk 2:2 TSG Hoffenheim
  • Manchester City 1:2 Lyon
  • Viktoria Pilsen 2:2 ZSKA Moscau
  • Real Madrid 3:0 AS Roma

RR novitads 23:00