Siglir tar il cuntegn

Naziunal/Internaziunal YB prolunghescha cun Adi Hütter

Ils Young Boys da Berna han prolungà anticipadamain il contract cun il trenader Adi Hütter, quai fin la stad 2018.

Adi Hütter, trenader dals Young Boys
Legenda: Adi Hütter, trenader dals Young Boys. Keystone

Il medem valia per ils dus trenaders assistents, Harald Gämperle e Christian Peintinger, communitgescha il club da ballape da Berna avant che partir vers l'Ucraina. Damaun gioga YB numnadamain la terza runda da qualificaziun per la Champions League cunter Schachtar Donezk.

Adi Hütter aveva surpiglià il club da la chapitala il settember 2015 sco successur da Uli Forte ed il trenader ad interim, Harald Gämperle. L’Austriac aveva manà la fin da la davosa stagiun ils Young Boys dal 5avel sin il segund plaz da la tabella. La bilantscha d’Adi Hütter cun YB fin oz en la Super League; 30 gieus, da quai 19 victorias, 6 paris e 5 terradas.

RR novitads 14:00