Siglir tar il cuntegn

Naziunal/Internaziunal Zakarin triumfescha en il Vallais

Ilnur Zakarin ha gudagnà l'etappa «svizra» dal Tour de France. Il Russ da 26 onns è stà il pli spert sin ils 184 kilometers da Berna a Finhaut-Emosson en il Vallais. Chris Froome ha pudì augmentar l’avantatg en il classament general.

Zakarin triumfescha en il Vallais
Legenda: Zakarin triumfescha en il Vallais Keystone

Ilnur Zakarin è anc stà il pli fit tar l’ascensiun finala si a Finhaut. Suenter ch’in gruppa da 14 ciclists è adina sa sminuida pli fitg, ha il Russ, 5 km avant l’arrivada, er laschà davos el ses ultim accumpagnader, il Columbian Jarlinson Pantano.

Suenter 184,5 km ha il profi da l’equipa Katusha pudì festivar en il Vallais sia pli gronda victoria da la carriera. Igl è era l’emprima victoria russa al Tour de France da quest onn. Segund è vegnì cun in retard da prest ina minuta il Columbian Pantano.

Froome augmenta avantatg

Chris Froome, il leader dal Tour, ha bain pers 7:59 minutas sin Zakarin. Da ses concurrents en il classament general è be Richie Porte vegnì il medem mument cun il Brit en l’arrivada. Nairo Quintana e cumpagnia han tuts pers temps sin Froome. El è ussa en il classament general:

  • 2:27 minutas avant Bauke Mollema
  • 2:53 minutas avant cumpatriot Adam Yates
  • ed il Columbian Nairo Quintana è sco quart gia 3:27 minutas enavos al Brit.

Dumogna Froome era la cursa cunter l’ura en las muntognas la gievgia senza pli gronds incaps, lura vegnia el fitg probabel a gudagnar suenter il 2013 e 2015 il Tour de France per la terza giada.

RR novitads 18:00