Gia suenter 7 minutas èn ils Svizzer ids en avantatg cun 1:0 entras Steven Zuber. Dentant anc avant pausa han ils Grecs pudì egualisar la partida. Il gol decisiv è alura crudà 6 minutas suenter la pausa entras Ruben Vargas, sin pass da Zuber. Silsuenter avessan ils Grecs gì pliras bunas schanzas per sajettar il 2:2. Tut èn tut èsi stà ina partida detg egualisada.
Yakin cumenza sia carriera sco trenader naziunal pia meglier che ses antecessur Vladimir Patkovic – lez aveva cumenza cun duas terradas.
Plirs debuts, pliras absenzas e Xhaka cun corona
Gist quatter giugaders han dastgà dar lur debut en la naziunala sut Murat Yakin. Avant 3'500 aspectaturs en il St. Jakob-Park èn il goli Gregor Kobel, ils defensurs Cédric Zesiger ed Ulisses Garcia sco er l'attatgader Andi Zeqiri vegnids tar lur emprima partida en il dress da la naziunala. Quai er grazia a pliras absenzas, uschia èn per exempel Xherdan Shaqiri, Mario Gavranovic, Loris Benito e Breel Embolo betg stads da la partida pervia da raschuns medicinalas.
Curt avant il gieu ha il capitani svizzer, Granit Xhaka, stuì ir en quarantina perquai ch'el è s'infectà cun il coronavirus.
Sch'il test vegn confermà damaun, vegn Xhaka er a manchentar il gieu da qualificaziun per il campiunadi mundial il 2022 en il Katar. La dumengia frunta la Svizra sin l'Italia, il campiun europeic.