Max Verstappen scriva vinavant vi da sia paraula tut atgna: Era tar il Grond Premi da l'Italia a Monza è il pilot da Red-Bull charrà en in'atgna liga. Cun sia 10avla victoria en seria ha el era passà Sebastian Vettel en chaussa victorias en seria. Per Verstappen èsi ultra da quai stà il 47avel success ad in Grond Premi insumma.
L’Ollandais era partì da la segunda posiziun en la cursa ed ha gia baud gì ina lutga cun Carlos Sainz. En la sisavla runda è Sainz anc sa dustà cun forzas, dal tuttafatg per gritta da Verstappen: «that was naughty!» («quai era garmadi!»), ha quel annunzià via func da team. Or da la box da Ferrari tunavi cun «good move!» tut auter – ina scena per surrir.
En runda 15 ha Verstappen la finala nizzegià senza cumpromiss in sbagl da Sainz ed è sa tschentà a la testa. Sainz ha curt avant la fin da la cursa er anc stuì laschar passar Sergio Perez, ses collega da team.
Titel da campiun mundial mo pli ina formalitad
Uschia ha la squadra da Red-Bull gudagnà fin uss tut quest onn – «be» anc otg success, e l’emprima stagiun perfetga d’in team en 74 onns istorgia da la Furmla 1 fiss realitad. Gia fitg baud dastgass Verstappen far perfetg ses terz titel da campiun mundial, tras sia 12avla victoria en la 14avla cursa ha il giuven da 25 onns bajegià ora ses avantatg sin Perez sin 145 puncts.
Hinwil s'allegra sin la plazza da top 10
Valtteri Bottas en l'Alfa Romeo ha mussà ina buna cursa ed è sa meglierà da posiziun 14 sin rang 10 final – quai dat in punct da campiunadi per il team da Hinwil. Il Finlandais da 34 onns è uschia charrà per la terza giada en la stagiun currenta en ils puncts. Guanyu Zhou è charrà sin il 15avel rang final.