Cun Cyril Fähndrich, Beda Klee, Candide Pralong e Roman Furger han ils Svizzers pers gia suenter l'emprima midada il contact cun la testa e n'han suenter betg pli dumagnà da vegnir datiers da la gruppa davant.
Il dischavantatg è creschì cuntinuadamain, ma Pralong e Furger èn sa tegnids en l'empima gruppa da persequitaders durant la segunda midada al skating. En il sprint final ha Furger lura anc tegnì davos el ils Americans ed ils Franzos sco er la segunda equipa da l'Italia. Uschia han ils Svizzers dumagnà sin plazza 8.
Pellegrino porta la victoria a l'Italia
Davant han cumbattì duas staffettas norvegiaisas, la Svezia e l'Italia per la victoria. L'ultim è sa mess tras il spezialist da sprint Federico Pellegrino. Edvin Anger ha salvà la Svezia sin plaz 2, Norvegia ha stuì sa cuntentar cun Harald Amundsen e Sindre Skar cun las plazzas 3 e 4.
Norvegiaisas giubileschan – Germania disqualifitgada
Tar las dunnas è il quartet norvegiais sa tschentà sin l'emprim plaz. Heidi Weng, Anne Kjersti Kalvaa, Ingvild Österberg e Silje Theodorsen han gudagnà cun distanza davant las Svedaisas favurisadas ed ils Stadis Unids.
L'equipa germana aveva finì la cursa a moda sensaziunala sin plazza 2 – è dentant vegnida disqualifitgada a la fin. Raschun è in sbagl formal. Sin la glista da start è anc adina stada scritta si Coletta Rydzek ch'è malsauna, sco curridura finala. Al start è dentant ida Sofie Krehl che n'era betg annunziada. Il trenader Peter Schlickenreider è stà consternà: «Jau hai annunzià memia tard che Coletta Rydzek è malsauna. Mes sbagl.»