Toni Livers, Ursina Matossi e Simon Kastenhuber fan a partir da la proxima stagiun d'enviern part dal team da trenament da passlung da Swiss-Ski. Els vegnan ad esser responsabels per atletas ed atlets d'elita en il Continental-Cup. Quai ha la federaziun da skis communitgà.
Ursina Matossi è nova en il team da Swiss-ski. Dapi il 2021 è ella stada chau-trenadra dal center da prestaziun Engadin Nordic. Toni Livers è stà l'onn passà chau-trenader dal team da juniors da Swiss-ski. Il Tudestg Simon Kastenhuber ha lavurà ils davos onns en la Norvegia en in team regiunal.