Il meglier passlunghist svizzer ha annunzià da terminar sia carriera, quai suenter questa stagiun. Dario Cologna ch’è daventà quatter giadas campiun olimpic, ha annunzià ch’el sa retira la fin da la stagiun 2021/2022. Cun ils gieus olimpics a Peking stat per il Jauer da 35 onns anc ina giada in punct culminant sin il program.
Jau hai vulì communitgar questa decisiun avant che cumenzar la stagiun, per ch'jau possia sa concentrar cumplainamain sin mias finamiras sportivas.
Meglier passlunghist svizzer
Dario Cologna è daventà quatter giadas campiun olimpic, ed ina giada campiun mundial. Ultra da quai ha il Jauer gudagnà sco emprim passlunghist svizzer insumma il classament general, quai la stagiun 2008/2009 – en tut è quai reussì ad el quatter giadas. Er quatter giadas è l'atlet da 35 onns stà sissum il podest dal Tour de ski.
Ord l'archiv – quatter giadas aur olimpic
Las entschattas da sia carriera
Dario Cologna ha festivà ses emprims success sco giuvenil, quai sin nivel naziunal. L'emprima medaglia internaziunala hai dà per il Jauer il 2006 en Slowenia, bronz sur 10 kilometers classic. Cologna ha fatg il gimnasi da sport a l'Institut autalpin a Ftan.
